Komisioni Hetimor Parlamentar për rastin e Arlinda Zekajt do ta mbështesë punën e tij në fakte, dokumente, dëshmi dhe përgjegjësi konkrete. Kështu është bërë e ditur nga përfaqësuesit e Komisionit, të cilët kanë theksuar se synimi është zbardhja e plotë e përgjegjësive institucionale lidhur me këtë rast.
Sipas deklarimeve të kryetarit të Komisionit, hetimi nuk do të ketë karakter politik, por do të përqendrohet në shqyrtimin e të gjitha hallkave institucionale, pa përjashtuar asnjë institucion apo individ nga përgjegjësia ligjore.
Ai u ka bërë thirrje të gjitha institucioneve që të bashkëpunojnë plotësisht me Komisionin dhe të përgatitin dokumentacionin e nevojshëm për procesin hetimor.
Duke iu referuar neneve 19 dhe 20 të Ligjit për Hetim Parlamentar, është theksuar se personat e ftuar për t’u intervistuar si dëshmitarë kanë obligim ligjor të bashkëpunojnë me Komisionin, ndërsa mosbashkëpunimi mund të sjellë pasoja sipas dispozitave përkatëse ligjore.
Komisioni do ta zhvillojë punën në tri faza, të përcaktuara me nenin 14 të Ligjit për Hetim Parlamentar:
- Faza e hetimeve – mbledhja e provave dhe dokumentacionit.
- Vlerësimi i hetimeve – analizimi dhe shqyrtimi i provave të mbledhura.
- Përgatitja e raportit final – përmbledhja e gjetjeve dhe rekomandimeve.
Qëllimi përfundimtar i këtij procesi është zbardhja e së vërtetës institucionale, identifikimi i përgjegjësive dhe propozimi i ndryshimeve të nevojshme ligjore e institucionale, me synimin që raste të tilla të parandalohen në të ardhmen.
