Në Qendrën e Mjekësisë Familjare “Rexhep Kuqi” në Suharekë ka filluar vaksinimi sezonal kundër gripit, me qëllim të mbrojtjes së shëndetit të qytetarëve dhe parandalimit të komplikimeve që mund të shkaktohen nga infeksioni i gripit.
Sipas informacioneve të bëra të ditura, qytetarët e interesuar mund të paraqiten për vaksinim çdo ditë, nga ora 08:00 deri në orën 16:00. Vaksinimi realizohet vetëm në Qendrën e Mjekësisë Familjare “Rexhep Kuqi” në Suharekë.
Vaksina sezonale kundër gripit ndihmon në uljen e rrezikut për t’u prekur nga format e rënda të sëmundjes dhe për të zhvilluar komplikime shëndetësore. Ajo është veçanërisht e rëndësishme për personat e moshuar, personat me sëmundje kronike, gratë shtatzëna dhe kategoritë e tjera që kanë rrezik më të lartë nga komplikimet e gripit.
Specialistët shëndetësorë rekomandojnë që qytetarët të informohen dhe të këshillohen me personelin mjekësor për vaksinimin, veçanërisht ata që bëjnë pjesë në grupet me rrezik të shtuar.
Orari i vaksinimit:
- Lokacioni: Qendra e Mjekësisë Familjare “Rexhep Kuqi”, Suharekë
- Orari: Çdo ditë, nga ora 08:00 deri në 16:00
Qytetarët ftohen të shfrytëzojnë këtë shërbim shëndetësor dhe të kujdesen me kohë për mbrojtjen e shëndetit të tyre dhe të familjarëve.
