Mbrëmjen e kaluar, shtëpisë së Big Brother VIP Kosova 4 iu bashkua një banor i ri që menjëherë ngjalli kureshtje tek publiku. Bëhet fjalë për Ludo Lee, një emër që për audiencën kosovare mund të ketë qenë më pak i njohur, por që në industrinë botërore të modës dhe luksit ka ndërtuar një karrierë të suksesshme.
Pas emrit artistik Ludo Lee qëndron Ludovik Tunaj, i lindur në fshatin Sallagrazhdë të Suharekës. Ai u largua nga Kosova në moshë shumë të re, vetëm pesë vjeç, duke u vendosur me familjen në Zvicër, ku edhe u formua profesionalisht dhe personalisht.
Rritja në Zvicër i dha atij një mentalitet perëndimor dhe qasje profesionale që do ta ndihmonin më vonë në ndërtimin e karrierës. Hapat e parë seriozë në botën e luksit i hodhi në ambientet më elitare të vendit, përfshirë resortin e famshëm St. Moritz, konkretisht në hotelin prestigjioz “Badrutt’s Palace”, ku nisi të krijojë kontaktet e para me emrat më të mëdhenj të industrisë.
Sot, Ludo Lee njihet si hairstylist dhe kurator imazhi i nivelit të lartë, duke punuar në prapaskenat e eventeve më prestigjioze ndërkombëtare. Prania e tij pranë figurave të njohura botërore nuk është rastësi, por rezultat i një pune të ndërtuar me përkushtim dhe profesionalizëm.
Në rrjetet sociale të tij shfaqen fotografi dhe momente me yjet më të mëdhenj të showbiz-it, ku disa nga emrat e konfirmuar me të cilët ka bashkëpunuar ose është takuar në rrethe profesionale përfshijnë:
- Kim Kardashian dhe Kanye West, me të cilët është parë në evente ekskluzive, ndërsa ka treguar se me Kim ka komunikuar edhe në gjuhën gjermane
- Eva Longoria, me të cilën ka pasur afrimitet profesional
- Emra të tjerë të njohur botërorë si Kendall Jenner, Hailey Bieber, Megan Fox dhe Adriana Lima
Hyrja e Ludo Lee në BBVK pritet të sjellë jo vetëm dinamika të reja në shtëpi, por edhe histori suksesi që lidhin Suharekën me skenën më elitare të botës së modës dhe luksit ndërkombëtar.
