Uran Haxha, është nderuar sot me Çmimin e Dytë për Shkrimin Ekonomik “Vangjush Gambeta”, i ndarë nga Unioni i Gazetarëve Shqiptarë, duke shënuar një tjetër vlerësim të rëndësishëm për punën e tij profesionale.
Ky çmim mban emrin e një figure që simbolizon gazetarinë e ndershme, të guximshme dhe në shërbim të interesit publik, çka, sipas fituesit, i jep këtij vlerësimi një peshë të veçantë. Vlerësimi vjen si çmimi i dytë radhazi, duke përforcuar besimin në përkushtimin dhe seriozitetin profesional në fushën e gazetarisë ekonomike.
Fituesi ka theksuar se ky vlerësim është një motivim i madh, por edhe një kujtesë për përgjegjësinë e vazhdueshme profesionale që kërkon gazetaria, veçanërisht në raport me të vërtetën dhe interesin publik.
Ai ka falënderuar familjen, redaksinë, kolegët dhe të gjithë ata që mbështesin gazetarinë e lirë, të pavarur dhe me ndikim, duke shtuar se ky çmim shërben si shtysë për të vazhduar përpara pa kompromis ndaj së vërtetës.
