Më 15 qershor 2025, profesori i njohur suharekas, z. Hamdi Bytyqi, është nominuar zyrtarisht si kandidat për Kryetar të Komunës së Suharekës nga Lëvizja Vetëvendosje, për zgjedhjet lokale që do të mbahen më 12 tetor.
Nominimi u bë publik gjatë një aktiviteti të organizuar në Suharekë nga vetë Kryeministri në detyrë dhe njëherësh Kryetari i Lëvizjes Vetëvendosje, z. Albin Kurti, i cili theksoi:
“Theranda gjithmonë ka merituar më shumë. Me Hamdi Bytyqin do të hapim një kapitull të ri zhvillimor e prosperues për qytetarët e kësaj komune punëtore e patriotike. Hamdiu ka përkrahjen e strukturave tona. Bashkë për Therandën.”
Kush është Hamdi Bytyqi?
Profesor Hamdi Bytyqi ka lindur në vitin 1965 në fshatin Semetisht të Suharekës. Është i martuar dhe baba i tre fëmijëve. Prej vitit 1994, ai ka qenë i angazhuar si mësimdhënës, ndërsa aktualisht ushtron funksionin e Drejtorit të Shkollës së Mesme Teknike “Skënder Luarasi” në Suharekë – një institucion i vlerësuar si ndër më të përgatiturat në nivel vendi për nga organizimi, stafi profesional dhe infrastruktura mësimore.
Shkolla që drejton ofron 11 punëtori praktike (informatikë, elektrikë, mekanikë, etj.) dhe numëron 607 nxënës dhe 62 mësimdhënës. Nën drejtimin e tij, janë ndërmarrë hapa të rëndësishëm për forcimin e lidhjes ndërmjet arsimit profesional dhe tregut të punës, si dhe është thelluar bashkëpunimi me bizneset lokale.
Angazhimi politik dhe përvoja publike
Nga viti 2009, profesor Bytyqi ishte anëtar aktiv i AAK-së, ndërsa në zgjedhjet e vitit 2021 u rendit si kandidati më i votuar i kësaj partie në Suharekë, duke marrë 3,405 vota.
Më 15 qershor 2025, ai zyrtarizoi kalimin e tij politik në Lëvizjen Vetëvendosje dhe shpalli kandidaturën për Kryetar Komune.
Sukseset në biznes dhe kulturë
Përveç karrierës së tij në arsim dhe politikë, profesor Hamdi Bytyqi është i njohur edhe për angazhimin e tij në sipërmarrje. Familja Bytyqi është e njohur për një ndër bizneset më të suksesshme në komunën e Suharekës që nga paslufta, duke kontribuar në zhvillimin ekonomik të zonës.
Ndërkohë, ai është edhe një figurë me kontribut të madh në jetën kulturore të qytetit. Ka qenë një nga themeluesit e parë të “Teatrit të Ëndrrave” në Suharekë, ku për tri dekada ka realizuar një numër të madh shfaqjesh teatrore, duke përfaqësuar komunën në festivale të ndryshme mbarëkombëtare dhe duke fituar disa çmime prestigjioze.
Zgjedhjet lokale në Suharekë – një garë sfiduese
Deri më tani, në garën për kryetar të Komunës së Suharekës janë shpallur:
- Bali Muharremaj nga AAK, aktualisht kryetar në detyrë;
- Dr. Ardian Shala nga LDK, megjithëse ende nuk ka bërë një shpallje publike zyrtare;
- PDK është në pritje të zyrtarizimit të kandidatit të saj.
Gara në Suharekë pritet të jetë e fortë dhe sfiduese, me alternativa të ndryshme politike që do t’i ofrohen qytetarëve për drejtimin e katër viteve të ardhshme.
