Qeverisë së Kosovës po i bëhet thirrje për heqjen e tarifave të vendosura ndaj mallrave të SHBA-së, pasi Administrata Trump vendosi një tarifë prej 10% për mallrat kosovare që eksportohen në SHBA.
Kësaj thirrjeje i është bashkuar edhe Qendra e Biznesit në Suharekë, e cila deklaroi se “e mbështet fuqishëm” thirrjen e presidentes Vjosa Osmani drejtuar Qeverisë së Kosovës për heqjen e tarifave doganore ndaj mallrave amerikane.
Kryetari i Qendrës së Biznesit në Suharekë, z. Refki Zogaj, tha se kjo kërkesë ka marrë mbështetjen e plotë të kryesisë së kësaj qendre.
Po ashtu Zogaj theksoi:
“Heqja e tarifës ndaj Shteteve të Bashkuara të Amerikës do të hapte mundësi të reja për zhvillimin ekonomik të Kosovës. Po ashtu, ky veprim do të forconte marrëdhëniet me aleatin më të rëndësishëm strategjik të Kosovës, Shtetet e Bashkuara të Amerikës, dhe do të shënonte një hap të madh drejt një tregtie më të lirë.”
