Gent Gashi nga fshati Studençan është një profesionist me mbi tetë vite përvojë të gjithanshme në administratën publike, diplomaci, menaxhim projektesh dhe shërbim politik në nivel lokal.
Aktualisht, ai ushtron detyrën e Drejtorit të Inspeksionit në një institucion komunal, ku me integritet dhe përkushtim udhëheq mbikëqyrjen dhe zbatimin e rregulloreve e ligjeve lokale.
Gashi ka vendosur të kandidojë për asamblenë e ardhshme komunale në Komunën e Suharekës. Ai ka përfunduar studimet Master në Marrëdhënie Ndërkombëtare – Diplomaci, në kuadër të Fakultetit Juridik, duke treguar një angazhim akademik të gjatë prej gjashtë vitesh.
Rruga e tij profesionale ka nisur si Administrator në Drejtorinë e Bujqësisë, për të vijuar si Zyrtar Ligjor në organizatën “Kosova Hope”. Për katër vite me radhë ka shërbyer si Koordinator i Projekteve në Agjencinë për Zhvillim Rajonal – Jugu (AZHR-Jug), ku ka udhëhequr dhe monitoruar projekte të rëndësishme zhvillimore.
Përveç angazhimit profesional, Gent Gashi është i njohur për aktivitetet e tij në fushën e sportit dhe rinisë. Ai ka qenë ish-kryetar dhe një nga themeluesit kryesorë të Klubit të Shahut “Studençani”, duke dhënë kontribut të çmuar në promovimin e sportit dhe aktiviteteve rekreative. Gashi ka ndihmuar gjithashtu në zhvillimin e infrastrukturës lokale dhe në nisma që mbështesin të rinjtë dhe komunitetin.
