Policia e Kosovës, në bashkëpunim të ngushtë me Prokurorinë Speciale të Republikës së Kosovës, ka arrestuar A. B., shtetas të Suedisë, i cili ndodhej në kërkim ndërkombëtar. Arrestimi u krye nga hetuesit e Drejtorisë për Hetimin e Krimit të Organizuar dhe Krimeve të Rënda, në rajonin e Prishtinës.
I dyshuari A. B. përballet me akuza për disa vepra të rënda penale, përfshirë:
– pjesëmarrje ose organizim të grupit kriminal,
– importim, transportim dhe shitje të paautorizuar të armëve apo materieve plasëse,
– falsifikim të dokumenteve,
– vjedhje të identitetit dhe pajisjes së qasjes.
Sipas hetimeve, A. B. dyshohet se ka drejtuar një grup kriminal që merrej me blerjen dhe tregtimin e armëve dhe municionit, si dhe me falsifikim dokumentesh me qëllim mashtrimi.
Bashkëpunim me autoritetet suedeze
Për shkak të faktit që i dyshuari është shtetas i Suedisë, Policia e Kosovës ka bashkëpunuar ngushtë me autoritetet policore të Suedisë. Ky bashkëpunim ka mundësuar lokalizimin dhe arrestimin e tij me datën 01.12.2025.
Dëshmitë e sekuestruara gjatë arrestimit
Nga bastisja në shtëpinë ku qëndronte i dyshuari, janë sekuestruar:
- 52,480 euro para të gatshme,
- patentë shoferi suedeze (dyshohet e falsifikuar),
- letërnjoftim suedez (dyshohet i falsifikuar),
- tre telefona celularë,
- një orë Rolex (ngjyrë e bardhë – ari),
- një HDD SEAGEATE P/N. 1TEAPS-500,
- një DVR,
- një veturë.
Provat e sekuestruara nga operacioni i mëhershëm (12.03.2023)
- 20 armë të tipit AK-47,
- 20 karikatorë për AK-47,
- dy automjete,
- gjashtë telefona,
- dokumente të ndryshme relevante.
I dyshuari është ndaluar për 48 orë, dhe brenda afatit ligjor Prokuroria Speciale do të paraqesë kërkesë për caktimin e masës së paraburgimit në Gjykatën Themelore në Prishtinë.
Policia e Kosovës dhe Prokuroria Speciale riafirmojnë përkushtimin për luftimin e krimit të organizuar, sjelljen e kryerësve para drejtësisë dhe forcimin e bashkëpunimit ndërkombëtar në luftën kundër krimit transkufitar.
