Ka përfunduar takimi mes Albin Kurtit dhe Isa Mustafës dhe është hera e katërt, pas zgjedhjeve të 6 tetorit, që keta dy lider takohen për të diskutuar rreth marrëveshjes për bashkëqeverisje, por përsëri akoma nuk kanë arritur marrëveshje për të drejtuar qeverinë e re.
Deputeti i LVV-së Glauk Konjufca ka thënë se do të vazhdojnë takimet për arritjen e marrëveshjes për bashkëqeverisje.
“U pajtuam që takimet tona të jenë më të shpeshta, dhe për këtë arsye nesër sërish do të takohemi. Ka diskonim prej të dy palëve të arrihet marrëveshja.Ne jemi të pakënaqur me ndërrimin e datës së konstituivit të Kuvendit sepse presidenti nuk ka dhënë asnjë shpjegim”, tha Konjufca.
Nënkryetari i LDK-së, Avdullah Hoti ka thënë pas takimit sot se janë dakorduar që t’i vazhdojnë takimet në baza ditore.
“Sot kemi pasë takim të gjatë, por besoj mjaft konstruktiv për të shkëmbyer të gjitha pozicionet tona për marrëveshjen që pritet të arrihet mes të dy subjekteve politike. Jemi dakorduar që të vazhdojmë takimet në baza ditore derisa të përmbyllim bisedimet. Kaq u dakorduam sonte”, tha Hoti.
Glauk Konjufca nga Lëvizja Vetëvendosje po ashtu ka bërë me dije që ështe i pakënaqur që presidenti i vendit e ka shtyrë nga 24 dhjetor në 26 dhjetor mbledhjen e parë të legjislaturës së shtatë të Kuvendit të Republikës së Kosovës.
“Ne jemi të pakënaqur me ndërrimin e kësaj date për arsye se Thaçi nuk ka dhënë asnjë arsye se me kë ka biseduar. Në momentin që ai nuk ka biseduar me partinë e parë që ka dalë me rezultat të parë dhe partinë e dytë, atëherë si mund të thotë një president se ka biseduar me të gjitha partitë. Ne kemi dyshimet tona se si është ndërruar kjo datë. Do të ishte shumë mirë që presidenti të na tregoj emrat e partive politike se pse mos me qenë data 24 por data 26 dhjetor, pavarësisht kësaj 26 dhjetori është edhe dy jave ditë, kështu që ne jemi të bindur se do të arrijmë një marrëveshje”, ka thënë Konjufca.
©Radio Vala
