Iniciativa e formuar nga Vjosa Osmani, ushtruesja e detyrës së presidentes, dhe Lëvizja Vetëvendosje në zgjedhjet e 14 shkurtit do të jenë me një listë të përbashkët të kandidatëve për deputetë.
Kjo u bë e ditur përmes një konference të përbashkët për media nga Osmani dhe Kurti.
Ndër të tjerash, Kurti njoftoi se të shtunën e 16 janarit do të dorëzojnë listën e kandidatëve për zgjedhjet e 14 shkurtit.
“Sot kur na ndajnë saktësisht 1 muaj nga zgjedhjet e reja në Kosovë, jemi të gëzuar dhe kemi kënaqësinë që do të garojmë bashkë në një listë. Osmanin dhe mua do të na gjeni në të njëjtin vend dhe me të njëjtin qëllim. Kemi bërë marrëveshjen e synimeve për një shtet me drejtësi dhe pa korrupsion. Kemi bërë marrëveshje të cilën porsa e kemi nënshkruar këtu para jush, marrëveshje kjo për një shtet në drejtësi pa korrupsion, për shoqëri me shëndet, punësim dhe arsim. ”
“Në fushatë zgjedhore do të jemi dhe do të angazhohemi bashkë. Të shtunën e 16 Janarit do të dorëzojmë listën e kandidatëve për zgjedhjet e 14 shkurtit. Viti 2020 ka treguar se Kosova ka nevojë për Kryeministër të ri por edhe presidente të re, ne e kemi presidenten e cila ka kryer punën me dinjitet dhe ka shprehur integritetin e Institucioneve dhe Unitetit te popullit. Sigurisht kemi shumë punë përpara por edhe një fitore të mëdha. Do të shërbejmë me përulësi për lirinë dhe barazinë e qytetarëve dhe suksesin e shtetit”, tha Kurti gjatë fjalimit të tij në konferencë.
